Առնվազն 19 երկրներ նախատեսում են Կլիմայի հարցերով COP26 գագաթաժողովում իրենց վրա վերցնել արտասահմանում հանածո վառելիքի նախագծերի պետական ֆինանսավորումը մինչեւ հաջորդ տարվա վերջը դադարեցնելու պարտավորությունը, հայտնում է Reuters-ը՝ վկայակոչելով աղբյուրներին:

Նրանց խոսքով՝ բրիտանական կառավարությունը, որը գլխավորում է այդ ջանքերը, վերջին րոպեին բանակցություններ է վարել ավելի շատ երկրների հետ գործարքներ կնքելու համար, որպեսզի նրանք ստորագրեն պարտավորությունը:

Աղբյուրները հայտնել են, որ մինչ այժմ համաձայնությունը ստորագրած երկրների թվում են Դանիան, Ֆինլանդիան, Կոստա Ռիկան, Եթովպիան, Գամբիան եւ Մարշալյան կղզիները, ինչպես նաեւ զարգացման մի քանի ինստիտուտներ, այդ թվում՝ Եվրոպական ներդրումային բանկը եւ Արեւելաաֆրիկյան զարգացման բանկը:

Երկրները պարտավորվում են մինչեւ 2022 թվականի վերջը դադարեցնել հանածո վառելիքի արտասահմանյան նախագծերի պետական աջակցությունը, թեեւ գործարքը թույլ է տալիս չնշված բացառություններ՝ սահմանափակ հանգամանքներում: