Եվրասիական տնտեսական միությունը (ԵԱՏՄ) եւ Ինդոնեզիան պաշտոնապես սկսել են ազատ առեւտրի գոտու ստեղծման մասին բանակցությունները, բանակցությունների առաջին փուլը նախատեսված է 2023 թվականի առաջին եռամսյակում։

Եվրասիական տնտեսական հանձնաժողովի (ԵՏՀ) առեւտրային բաժնի փոխանցմամբ՝ բանակցությունների մեկնարկի մասին հայտարարությունը ստորագրել են ԵՏՀ առեւտրի նախարար Անդրեյ Սլեպնեւը եւ Ինդոնեզիայի առեւտրի նախարար Զուլկիֆլի Հասանը։

«Եվրասիական տնտեսական միությունը մեծ նշանակություն է տալիս Ինդոնեզիայի հետ փոխշահավետ համագործակցության զարգացմանը, որը Հարավարեւելյան Ասիայի պետությունների ասոցիացիայում եւ ամբողջ Ասիա-Խաղաղօվկիանոսյան տարածաշրջանում մեր հիմնական առեւտրային  գործընկերներից մեկն է:  Ինչպես ցույց է տվել ուսումնասիրությունը, առեւտրի պայմանների ազատականացումը կարող է ապրանքաշրջանառությունն ավելացնել եւս 1,5 միլիարդ դոլարով», – ասել է Սլեպնեւը։

2022 թվականի հունվար-սեպտեմբերի արդյունքների համաձայն՝ Ինդոնեզիայի հետ ԵԱՏՄ ապրանքաշրջանառությունը 2021 թվականի նույն ժամանակահատվածի համեմատ ավելացել է 48,4 տոկոսով, արտահանումն՝ ավելի քան 2,5 անգամ, ներմուծումը՝ մոտ 16 տոկոսով։ 2021 թվականին Ինդոնեզիայի հետ ԵԱՏՄ երկրների ապրանքաշրջանառությունը կազմել է 3,8 մլրդ դոլար։

ԵԱՏՄ-ի եւ Ինդոնեզիայի միջեւ ազատ առեւտրի գոտու ստեղծման շուրջ հերթական բանակցությունները  սպասվում է, որ կանցկացվեն 2023 թվականի գարնանը Եվրասիական տնտեսական համաժողովի շրջանակում։