Նախորդ տարի Երևանում առաջին անգամ տեղի ունեցավ Եվրասիական գործընկերության առաջին միջազգային համաժողովը: Համաժողովը կազմակերպվել էր Ռուսաստանի հայերի միության և Եվրասիական համագործակցության միջազգային համաժողովի նախագահ Արա Աբրահամյանի կողմից՝ Եվրասիական տնտեսական միության, և Հայաստանի կառավարության աջակցությամբ:
Համաժողովը նպատակ ունի ապահովել հայկական արտադրողների ներկայացվածությունը ԵԱՏՄ շուկայում, նպաստել Հայաստանում ԵԱՏՄ երկրների գործընկերների ներդրումների ներգրավմանը:
Եվրասիական գործընկերության առաջին միջազգային համաժողովից արդեն մեկ տարի է անցել և համաժողովի համակարգող խորհրդի աշխատակազմն ամենօրյա կապերի մեջ է Հայաստանի գործարարների և ԵԱՏՄ տնտեսական շուկայի գործարար հատվածի հետ, փորձելով հարաբերություններ հաստատել և երկխոսություն ստեղծել նաև երկկողմ այցելությունների և շփումների միջոցով:
Նման միջոցառումների շրջանակներում Արա Աբրահամյանի նախաձեռնությամբ վերջերս Հայաստան էր ժամանել ՌԴ արդյունաբերության և առևտրի փոխնախարար Գլեբ Նիկիտինը, որի հանդիպումները հայ գործարարների հետ բավականին արդյունավետ անցան՝ բարձր գնահատական ստանալով ռուս գործընկերների կողմից: Այդ հանդիպումներից մեկին ներկա էր «Էլբատ» էլեկտրական մարտկոցներ արտադրող ընկերության գլխավոր տնօրեն Դավիթ Ղալթախչյանը, որի հետ հարցազրույցը ներկայացնում ենք մեր լսարանին:
Պարո՛ն Ղալթախչյան, երբ գործարանը հիմնվում էր, ռուսական շուկան ուսումնասիրվա՞ծ էր և հնարավոր սպառող համարվո՞ւմ էր:
Այն ժամանակ ավելի շատ հնարավոր սպառող դիտարկվում էր եվրոպական շուկան, և գործարանը ստեղծվել է եվրոպական ստանդարտներով, թե՛ արտադրանքը, թե՛ գործարանի սարքավորումները լրիվ համապատասխանեցված են եվրոպական չափանիշներին: Ռուսական շուկան որպես առաջնահերթություն չի դիտարկվել, բայց հիմա այն մեզ համար ամենակարևոր շուկան է համարվում:
Գործարանի արտադրանքի ո՞ր մասն է արտահանվում։ Որքա՞ն է դրա մեջ կազմում ԵԱՏՄ երկրների, մասնավորապես ՌԴ մասնաբաժինը։
Այս պահի դրությամբ Ռուսաստան որևէ արտադրանք չի արտահանվում՝ կապված հումքային նյութերի բարձր ինքնարժեքի և տրանսպորտային ծախսերի բարձր մակարդակի հետ, ռուսական շուկա ներխուժելը բարդ է, բայց աշխատում ենք դա նվազագույնի հասցնել:
Արա Աբրահամյանի և Գլեբ Նիկիտինի հետ սեպտեմբերի սկզբին կայացած հանդիպման ընթացքում ռուս պաշտոնյան ակնհայտ հետաքրքրություն արտահայտեց ձեր արտադրանքի նկատմամբ, բայց ռուսաստանցի գործընկերների հետ դրա առաջխաղացման և իրացման որոշակի դժվարություններ կան, որո՞նք են դրանք:
Մեզ հնարավորություն տրվեց համագործակցել ռուսական ընկերություններից մեկի հետ, և բավականին երկար տեխնիկական պարամետրերի հաստատումից հետո, երբ ռուսական ընկերությունում համոզվեցին մեր հնարավորություններում, բանակցությունների հաջորդ կոմերցիոն փուլն անցանք: Քանի որ տվյալ ընկերությունը գնառաջարկներ էր ստանում տարբեր ընկերություններից, բնականաբար, մեր ընտրած նվազագույն գինը նույնիսկ չէր էլ կարողացել մրցակցել ռուսական շուկայի տրամադրած գների հետ: Պատճառն այն է, որ մեր հիմնական հումք հանդիսացող կապարը, որը մարտկոցի գնի 60 տոկոսն է կազմում, ներմուծվում է Ռուսաստանից: Տրանսպորտային ծախսերը և հավելյալ այլ ծախսերն ավելի թանկացնում են մեր արտադրանքը: Կոնկրետ տվյալ ընկերությունը նախապատվությունը տվեց ավելի ցածր գնով ընկերության առաջարկին, չնայած պայմանավորվածություն ձեռք բերեցինք, որ եկող տարվա ընթացքում նորից մասնակցենք մրցույթին: Մենք կկարողանանք կապարի որոշ տեսակներ տեղում ստանալ, հետևաբար, ավելի ցածր գնով հանդես գալու հնարավորություն կունենանք:
Բացի այդ, ռուսական շուկա մտնելու դժվարությունները կապ ունեն ԱԱՀ-ի հետ, այսինքն առանց ԱԱՀ-ի Հայաստանից հաշիվների դուրս գրում և Ռուսաստանում ԱԱՀ-ով վճարումը և ձևակերպումները լրացուցիչ գործողություններ են պահանջում ռուսական ընկերությունների համար: Այս ամենը ռուս գնորդի համար դժվարություններ է առաջացնում, որն էլ նախընտրում է ռուսական գրանցում ունեցող ընկերությունից ապրանք գնել:
Իսկ մենք, որպեսզի այդպիսի վաճառք իրականացնենք, պետք է մեր ներկայացուցիչները, պահեստներն ունենանք, որը հավելյալ ծախսերի հետ է կապված:
Պարոն Աբրահամյանի կազմակերպած հանդիպումներն այս առումով շատ օգտակար են հայկական ընկերությունների համար, քանի որ բարձրաձայնում են իրենց խնդիրները: Մեր խնդրի հետ կապված այդ հանդիպումներից մեկում նույնիսկ Ռուսաստանի էկոնոմիկայի նախարարության աշխատակիցը խնդրի մանրամասն նկարագրություն պահանջեց, ասելով, որ կաշխատեն համապատասխան լուծումներ գտնել:
Առաջիկայում նախատեսվում է Եվրասիական գործընկերության երկրորդ միջազգային համաժողովը, որ կազմակերպում է Արա Աբրահամյանը: Ինչպե՞ս կգնահատեք այս նախաձեռնությունը:
Ամենաբարձր գնահատականը կարող եմ տալ մեր ընկերության, և մասնավորապես, իմ անունից, քանի որ նման մակարդակի գործարար շփումները և տեղեկատվական փոխանակումը բավական արդյունավետ են, նախորդ հանդիպման ժամանակ հնարավորություն ունեցանք հանդիպելու «ԿԱՄԱԶ» ընկերության խմբի փոխտնօրեններից մեկի հետ, որը հիմք հանդիսացավ հետագա 4-5 ամիսներին «ԿԱՄԱԶ»-ի հետ բանակցությունների, ճիշտ է դեռ արդյունքներ չկան, բայց փաստը, որ մեզ ճանաչեց «ԿԱՄԱԶ»-ի նման ընկերությունը, արդեն մեծ հնարավորություն է այդ ահռելի շուկայում ներկայանալու համար:
Պատրաստվու՞մ եք ԵԱՏՄ շուկայում ձեր ընկերության հաջողված փորձը և խնդիրները ներկայացնել այդ համաժողովին:
Մեծ հաճույքով կցանկանանք այդ բոլոր խնդիրները ներկայացնել, բայց ես առավել հակված եմ ներկայացնել հաջողության պատմություններ, քան միայն խնդիրների մասին խոսել:
Ո՞ւմ կցանկանայիք տեսնել այդ համաժողովին և ի՞նչ ակնկալիքներ ունեք դրանից:
Հետաքրքրություն ունեմ հանդիպելու ոլորտի ներկայացուցիչների՝ մեր նույն արտադրանքից արտադրող ընկերությունների ղեկավարների կամ սպառողների հետ, իմանալ նրանց խնդիրները, հասկանալ պահանջները և հնարավորության դեպքում այդ պահանջներին համապատասխան առաջարկներ անել: Մեր ընկերության տեխնիկական հագեցվածությունը թույլ է տալիս ոչ ստանդարտ լուծումներ տալու, որը բավականին հետաքրքիր է ռուսական սպառողների համար:
Մենք պարոն Աբրահամյանի հետ պայմանավորվածություն ունենք, և ըստ երևույթին, ֆորումից դուրս հանդիպումներ կունենանք և կքննարկենք հումքային նյութերի մատակարարման հետ կապված հարցերը: