Եվրասիական տնտեսական հանձնաժողովը (ԵՏՀ) շարունակում է աշխատանքներ տանել Եվրասիական տնտեսական միության (ԵԱՏՄ) երկրներում դեղագործական բիզնեսի համար բարենպաստ պայմաններ ստեղծելու ուղղությամբ: 2017-2018 թվականներին դեղերի ոլորտը կարգավորող 67 լրացուցիչ փաստաթուղթ կպատրաստվի: Այս մասին հայտարարել է ԵՏՀ տեխնիկական կարգավորման կոլեգիայի անդամ (նախարար) Վալերի Կորեշկովը՝ բացելով ԱՊՀ երկրների Դեղագործական ֆորումի շրջանակում իրականացվող նիստը:
Հանդես գալով դեղամիջոցների ընդհանուր շուկայի կարգավորման մասին զեկույցով՝ ԵՏՀ նախարարը մասնակիցների ուշադրությունը հրավիրեց փաստին, որ Հանձնաժողովի պրոֆիլային աշխատանքային խումբը պատրաստել է այսպես կոչված երրորդ մակարդակի մի շարք փաստաթղթեր: Դրանց թվում են դեղագործական նպատակներով օգտագործվող ջրին ներկայացվող պահանջները, մոդիֆիկացված դեղային ձեւերի որակի ցուցանիշներին վերաբերող պահանջները եւ այլն:
Հիմա ԵՏՀ-ն աշխատում է այս ոլորտի մոտ տասնմեկ նորմատիվ ակտերի նախագծերի վրա: Դրանք թույլ կտան դեղամիջոցների բարձր որակ ապահովել, որն անհրաժեշտ է միության երկների դեղագործական արտադրանքը միջազգային շուկա արտահանելու համար:
Վալերի Կորեշկովն ընդգծեց, որ փաստաթղթերի մշակման գործում թափանցիկությունը Հանձնաժողովի եւ աշխատանքային խմբի կարեւոր սկզբունքներից է: Բոլոր ակտերը ներկայացվում են հանրային լայն քննարկման Միության տեղեկատվական պորտալում:
ԵԱՏՀ Դեղաբանական կոմիտեի ղեկավար Ելենա Սականյանը տեղեկացրեց, որ 2018 թվականին լույս է տեսնելու Միության Ֆարմակոպիայի` դեղերի որակին ներկայացվող միասնական ժողովածուի առաջին հատորյակը: Այն թույլ կտա ապահովել Միությունում արտադրվող դեղամիջոցների որակի վերահսկողության միասնականությունը:
Հայաստանի, Ղազախստանի եւ Ղրղզստանի իրավասու մարմինների ներկայացուցիչները հայտնեցին, որ այդ ոլորտում ազգային օրենսդրության համաձայնեցումը ԵԱՏՄ պահանջներին կավարտեն ընթացիկ տարվա ապրիլին: